من حزايات الاول حزاية انتيف انتيفاني

من
من حزايات الاول حزاية انتيف انتيفاني

من تراثنا القديم الاول
نتجمعنا عند ام الساده الله يرحمها برحمته
عاد اماي قولو لي حزايه
عاد لضباع يتدلعوا يتثيقلوا علينا
نهو عني بلا فهاجه وخراقه علي وصيري مره
وحنا نتوسل وبوس ايادي وروس ما ادري وصلنا لرجايل لولا
الله يرحمهم برحمته
الله يرحمهم جداتي ما يقصروا يعلمونا الله يرحمهم برحمته
من القصص الي يحكوها لينا قصة قصة انتيف انتيفاني
عاد هادي القصه لليوم احكيها لولاد اختي اذا بغوا قصه
بس بيني وبينكم ولاد اللحين مو زينا الاول نحب هالاشياء
ايه اللحين تلفزيون كراتين 24 ساعه
وغير البلي ستيشن والقيم بوي والانترنت ما خلو شئ
وسائل التسلايه متوفر اشكال والالوان
صايره اتحجي كأني ضبعه من زمن لول
نرجع حق محور حدينا
من زمان الاول في مره الله ما رزقها عيال مسكينه هالمره تبغى ولد تأنس فيه وحشتها وحيده ورجلها مات وما بقت الاهي
كانت هالمره وسيلة رزقها اتبيع في بيتها صاص ونعلة ابو صبع وحليب قوطي عرانص وخوخ ومن هالحجي اشياء صغيره يعنو
عاد داك اليوم راحت اخباز وشرت ليها سبعه قروص خبز وحطتهم في المنز وقامت تهز فيهم وهي تقول ياولادي سكتوا على شان تكبروا وتصيروا رجال وهي تهز وتتكلم معاهم
المهم في هالاثناء جتها وحده من جيرانها تشتري قطرة حليب
شحوالكم زنين ...ترد عليها ايه حياش الله تفضلي ودخلت المره وقالت ليها ابغي قطرة حليبه قالت ليها ما عليه بس تعالي هزي لي ولادي لا يصيحوا
عاد ديك المره استغربت ولاد ما عندها دي ولاد المهم ديك راحت تجيب الحليب وديك المرة قعدت تهز لولد المهم وهي تهز طلعت ريحة الخبز
اتقول اح وش هالريح الخنينه من وينه جايه ...قامت اتدور كان تفتح المهز وتشوف الخبز
تقول يو هذا خبز وش فيها هالمره عفر استجنت اهو خلني اخذ لي نتفه واخذت ليها نتفه واكلتها واخذت حليبتها وطلعت
ويوم على يوم صاروا هالقروص السبعه إلى رجال سته منهم كاملين طول وعرض
والسابع الي هو القرص السابع الي اخذت منه المره صار اصغيرون نتفه فسموه انتيف انتيفاني
في يوم من الايام قرروا لولاد يسافروا يسترزقوا الله في هالارض الوسيعه وامهم ما رضت قالت كيف تخلوني لوحدي اني يالله يالله جبتكم وتعبت عليكم(مصدقه عمرها هالمره )
قامو قالوا ليهم لا اماي خلنا سافر على شان نجيب فلوس ونعرس وتشوفي اولادنا
ويالله يالله اقتنعت هالام المسكينه وشريت ليهم كل واحد خيل الا انتيف انتيف انتيفاني شرت له تيس على قده وش يركبه خيل المهم جاء اليوم الي يسافروا فيه وجوا يودعوا امهم وتعانقوا(يعني تحاضنوا ) وقامت الام توصي اولادها على اخوهم الصغير انتيف انتيفاني
اهتموا فيه وخافوا عليه في هالبر ومشوا لولاد في الصحراء
وبعدين جاء الشيطان ليهم قاموا يقولوا هذا انتيف نتيفاني صغير مو زينا احنا عندنا خيول وهو بس تيس خلونا نركض عنه وش نبغي فيه
المهم قامو يركضو عنه
عاد هم قدام وداك بتيسه وراى (تخيلو المنظر معاي )
قام اخوهم المسكين انتيف نتيفاني يزعق عليه يا اخوتي انا اخوكم حارسوني وينه بتروحوا عني قالوا روح منت اخونا كلنا اكبار انت نتفه واحنا عندنا خيول وانت ما عندك الا هالتيس الي على قدك
وقام هالنتفه يتوسل في اخونه وهم ولا كأنهم سامعينه هالمسكين
بعد ما سمع كلامهم قام دعا عليهم وقال ياربي يجيكم جبل على جبل ما تقدروا تعبروا منه بس خلص كلامه كان تتطلع في ديك الصحراء جباله واجد مو عارفين كيف يعبروا وقفوا محتارين وش يسوا
قالو يو هذا انتيف انتيفاني دعا علينا المهم قالو خلنا انصالحه ورحوا له وهم يقولو :انتيف انتيفاني ياخونا يا ولد امنا وبونا يا شارب من ذرة امنا وابونا تعال ويانا نبغاك (تصقع الحياله نايبه تصقعهم)
انتيف انتيفاني ما رضى قال ليهم توكم تعيروني وتقولو انا مو اخوكم خلاص روحوا عني انا مو اخوكم
قالوله لا انت اخونا واحنا انحبك وقامو يرشوا فيه ومسكين انتيف انتيفاني وعلى نياته طيب ووافق قام يقول هدرك يا تيسي هدرك هدرك يا تيسي هدرك والا هالجبال تتهدرك وتستوي وي الارض وقامو يمشوا معاه ولا كأنه صاير شئ
لكن اخوته ما جازوا عودوا نفس الطريقه قالو هذا انتيف نتيفاني صغير مو زينا احنا عندنا خيول وهو بس تيس خلونا نركض عنه وش نبغي فيه
المهم هو مسكين وعلى قلبي قام يزعق يا اخوتي تعالوا انا اخوكم توكم تقولوا انا اخوكم قالو له لا منت اخونا روح عنا ما نبغاك
قام عود دعاء عليهم يا ربي يجيكم بحر على بحر ما تعبروا منه لا انتون ولا خيولكم
بس خلص كلامه الا يطلع ليهم بحور في هالصحراء
قالو اوه هذا انتيف انتيفاني عود دعاء علينا خلنا نرجع له وش نسوي بعد كده ما بنوصل
المهم رجعوا له وهم يقولو انتيف انتيفاني ياخونا يا ولد امنا وابونا تعال احنا نحبك ونبغاك ويانا
قال ليهم روحوا انا مو اخوكم تقول اتباعدوا عني يالله
وظلوا يراشوه لين ما رضى هالمسكين وقام يقول هدرك يا تيسي هدرك هدرك يا تيسي هدرك وله البحور تبلعها الارض ولا كأنه هالمكان كان فيه قطرة ماي
المهم عودوا يمشوا مع بعض ومشوا ليهم اشويه زينه كان يعودوا ينجفوا فيه فقير الله يقولو وش نبغي فيه هالنتفه خلونا نركض عنه احنا قواي وهو صغير لا راح ولا جاء
المهم قامو يركضوا عنه شافهم يركضوا عنه قام يزعق عليهم يا اخوتي تعالو لويش تركضوا عني انا احبكم قالو له انت منت اخونا روح عنا ولا نحبك
]المهم ايقن هالمسكين نفس قبل وقام يدعي عليهم وقال عساكم سلى على سلى (شوك ) ما تعبروا منه لا انتون و لاخيولكم المهم خلص كلامه الا ديك الصحره تنقلب الى كله سلى وشوك عن يمينهم يسارهم وهم مو عارفين وين يروحوا
قالو وش نسوي خلنا نرجع لنتيف انتيفاني بدونه ما بنخلص ولا بنوصل عودوا قالو له انتيف انتيفاني يا خونا يا ولد امنا وابونا تعال اخونا امشي ويانا احنا نحبك (تصقع الحياله )
المهم قال ليهم لا انا مو اخوكم يالله روحوا عني كل مره تلعبوا علي وقامو يقول له احنا نهرج وياك بس كده انت صدقت
مسكين رضى وصدقهم وقام قال هدرك يا تيسي هدرك هدرك يا تيسي هدرك الا ديك السله تختفي ولا ظلت سلايه وحده
المهم ظلوا يمشوا لين وصلوا إلى بيت قديم واقفه صوبه مره ضبوعه عجوز ماسكه عصاته
وقامو يسلموا عليه السلام عليكم يا عمتاه يا خالاته يا جدتاه وقامت ترحب وتهلل بهم
]تفضلوا يا ولادي حياكم الله وجابت ليهم ماي وشربوا وسوت ليهم اكل ما في خروف الاذبحته وحشته ما لذا وطاب تحشيها دياج (دجاج ) وحمام وبيض وخلت ولا بقت بصل طماطه لين ما نتفخ داك الخروف وطبخت ديك لعيوش والصواني الي تنجل وديك الفواكه الي تنجل مالذا وطاب
وهي تقول ليهم كلوا يا ولادي شكلكم جوعانين ومن زمان ما اكلتوا
استانسوا لولاد لكن انتيف انتيفاني حس قلبه بالشر
واخوته قاموا ياكوا ما خلو ولا بقوا مستانسين
بس هالعجوز انتبهت إلى انتيف انتيفاني اكل شويه بغيته يعني ووقف وقامت تقنع فيه كل ياولدي انت صغير يبغي لك غذاء على شان تكبر شوفا خوانك كيفه وانت كيفه المهم هالنتفه ما جاب خبرها ولا اكل قال اكيد هالضبعه وراها شئ
المهم شبعوا ونعسوا يبغوا يناموا راحت فرشت ليهم دواشق وكل واحد حط راسه وهم مستانس
وكل واحد يقول لثاني هالمره تحبنا كأنه احنا اولادها
لكن انتيف انتيفاني قال ليهم لا ما عليكم منها الضبعه ما يندرا وش وراى راسها
قالو له وش تقول اصلا شكلها طيبه اسكت يالله اسكت قال ما يندرى وش وراها اهو اسكت عنا ونام
المهم ناموا جت نامت معاهم بعد ما جهزت جدر وش كبره وش عرضه على شان تطبخهم وتاكلهم (طلعت هالمره من أكلي لحوم البشر )
المهم الاخوه حطو روسهم على الوساده ونامو ما ضل الا خوهم انتيف انتيفاني كان قلبه حاس بشر
والضبعه يوم سمعتهم ساكتين والي يشخر والي ينخر استانست قلت نامو
قالت خليني اتاكد المهم قامت اتقول الناس نامت واستنامت ما بقت الاعيني وعينك يالله
الا انتيف انتيفاني يقول انا وياش ديده
قالت الضبعه :هداويش يا ولدي لويش ما نمت انت تعبان واخوتك نامو ما بقيت الا انت
المهم سكتت وقال اكيد نام وعودت اتقول الناس نامت واستنامت مابقت الاعيني وعينك يالله
وعود قال ليها انا اوياش ديده
قالت يا ولدي لويش ما نمت باجر عليك سفر يالله نام واستريح
المهم عودت الكره ونفس الرد يرد عليها انتيف انتيفاني
لين ما نامت العجوز
عاد انتيف انتيفاني اسمع شخير الضبعه كان يروح يوعي اخوته ويقول ليهم ترى الضبعه تبغى تاكلنا يالله قوموا خلنا نهرب
وقامو وحطوا مكان نومهم جدوع النخيل وغطوهم وهربوا
المهم اوتعت العجوز من نومها قالت يو اكيد نام انتيف انتيفاني زي ما اني نمت المهم عودت قال الناس ناموا واستنامو ما بقت الاعيني وعينك يالله
شافت ما احد رد عودت تبغي تتأكد وردت قال الناس نامت واستنامت ما بقت الا عيني وعينك يالله
شافت ما احد رد
قالت يو شكله نام انتيف انتيفاني
قامت تزعق عليه بصوت واطي انتيف نمت يا ولدي شافت ما احد رد
فرحت الضبعه قال اكيد نام كان تروح تعض واحد من الجدوع الي حطوهم مكان نومهم وتطيح باقي ضروس الضبعه
وسلمو انتيف انتيفاني واخوته من هالضبعه
ورجعوا الى امهم بسلام وامان

هههههههههههههههههههههه
مشكورة ام الميرزا على القصة الجميييلة

يسلمووو على القصة